Allt mögulegt

Til hvers að hvílast.....???

Mon, 08 Sep 2008 23:21:07 GMT

Smá pæling!

"Frekar en að sitja aðgerðarlaus og ryðga, verðum við að framkvæma, gefa af okkur og leggja eitthvað af mörkum til heimsins. Franski fræðimaðurinn Robert Arnauld (1588-1674) sagði, "Höfum við ekki alla eilífð til að hvílast?" Af hverju leitist þið við að hvílast meðan þið eruð enn á lífi? spyr hann. Þetta eru sannarlega virðingarverð orð. Þegar ungt fólk leggur sannarlega eitthvað á sig, refsar næstum sjálfu sér, mun þeirra sanni stórfengleiki birtast."

Hvað segið þið um þetta? Hehehehe nokkuð til í þessari speki!

Spekikveðja Jóhanna Facebooker

Líf án eineltis - getur þú hjálpað?

Fri, 05 Sep 2008 13:56:37 GMT

Bréf sem ég fékk sent í dag og langaði að deila með ykkur:

LÍF ÁN EINELTIS

STOFNUM SAMTÖK FORELDRA EINELTISBARNA

Ég skrifa til þín í þeirri von um að fá hjálp, leiðsögn, hugmyndir og sem flest sjónarmið og stuðning til að gera draum að veruleika.

Að styðja eineltisforvarnir með því að stíga fram og lýsa yfir stuðningi við stofnun eineltissamtaka, samtaka foreldra eineltisbarna.

Ég þarf þig, ég þarf að ná til þín. .

Stór hópur fólks sem á börn í skóla í dag og glímir við eineltisvandann og fólk sem á eldri börn í dag sem glímdu við eineltisvandann á sínum tíma er enn þann dag í dag að glíma við afleiðingarnar. Þunglyndi, kvíða, fólksfælni, sjálfsásökun og lélegt sjálfsmat. Foreldrar sem eru hræddir um börnin sín. Einelti er dauðans alvara.

Hinsta kveðja mín til sonar míns, sem lesin var á jarðaför hans.

Elsku Lárus minn, ástin hennar mömmu sinnar.
Þakka þér fyrir þann tíma sem þú gafst mér og allt sem þú kenndir mér og öðrum.

Þú hefur snert strengi svo ótalmargra sem þykir vænt um þig
og þú átt eftir að snerta strengi svo ótalmargra um ókomin ár.
Sú sára reynsla sem þú fórst í gegnum sem barn og unglingur,

að fá ekki að njóta tilveruréttar þíns og fá ekki að vera eins og þú varst
óáreittur markaði þig fyrir lífstíð.

Því miður, það er sárast af öllu.
En sú barátta sem við hófum þá gegn einelti og skilningsleysi fólks á
hættulegum aðstæðum í skólum sem upp koma heldur áfram í þínu nafni og mun lifa.
Þú kenndir mér umburðalyndi, þolinmæði og að sýna öllum

skilning og nú látum við það berast.

Ég trúi því elsku drengurinn minn að þú sitjir nú í englaskara sæll og glaður.
Að á mínum mesta sorgardegi hafir þú átt þinn mesta hamingjudag.

Litli outsiderinn minn. Ef þú hefðir bara heyrt, ef við hefðum bara
komist inn fyrir brotnu sjálfsmyndina þína og þú hefðir séð og trúað
hversu frábær maður þú varst.

Betri mann gat engin stúlka eignast.

Þú varst prakkari, fyndinn, uppátækjasamur, duglegur, hugrakkur, fallegur
og góður.

Ég sat úti í sólinni með fjölskyldu og vinum fyrir 21. ári síðan og
við biðum fæðingar þinnar og nú hef ég setið úti í sólinni með
fjölskyldu og vinum og beðið þess að kveðja þig frá þessu jarðvistarlífi.
Kveðjustundin er komin engill og ég er svo óendalega sorgmædd.

Ég bið þig að fyrirgefa mér,
Allt sem ég gerði og hefði ekki átt að gera.
Allt sem ég gerði ekki en hefði átt að gera.
Allt sem ég sagði en hefði ekki átt að segja.
Allt sem ég sagði ekki en hefði átt að segja.

Þú gafst mér ást þína óskilyrta og þar var ég heppin.
Ég elska þig af öllu mínu hjarta og allri minni sál.

Ég vil stofna eineltissamtök, samtök foreldra eineltisbarna, sem hefðu það markmið að styðja við bakið á foreldrum eineltisbarna, veita upplýsingar, hjálpa þeim sem eru hjálparþurfi, leyfa fólki að tala og tjá sig, fá huggun og uppörvun hjá fólki sem þekkir þessi mál og er búið að ganga þessi þungu spor.

Samtök, með fundaraðstöðu og föstum fundum þar sem foreldrar eineltisbarna gætu komið saman og leitað eftir stuðningi og ráðgjöf, skipst á skoðunum og miðlað af sinni reynslu.

Opna vefsíðu, símaviðtalsþjónustu.......

Samtökin munu líka vinna sem þrýstihópur fyrir þeim breytingum þar sem þörf er á innan skólakerfisins. Eins og t.d.

Að skólastjórnendur setji vinnu gegn einelti í forgang og forvarnarstarf í fyrsta sæti í sínum skóla og vinni markvisst að því að öllum líði vel í skólanum, alltaf.

Skólinn er vinnustaður barnanna og við foreldrarnir eigum að geta treyst því að þeim líði þar vel. Ef þeim líður ekki vel hvernig er þá brugðist við því og hversu fljótt?

Það þarf að stórauka úrræði, finna betri úrræði þegar eineltismál koma upp og auka forvarnastarf stórlega í mörgum skólum.

Er nógu markvisst fylgst með því hvort unnið er eftir eineltismarkmiðum í aðalnámskrá grunnskólanna eða hvort skólar hafa starfandi eineltisteymi sem foreldrar eiga sæti í og eineltisáætlun til að vinna eftir?

Hve mikið er lagt upp úr sýnileika eineltisforvarna? Hvað þarf til að vekja fólk til umhugsunar. Þarftu að hugsa þig um?

Í baráttunni fyrir bættum vinnubrögðum í eineltismálum, þarf að fá skólayfirvöld til að skilja að eineltið byrjar ekki heima.

Bæjar- og skólayfirvöld þurfa að axli þá ábyrgð sem þeim ber samkvæmt lögum.

Hættum að vísa vandanum heim til þolanda.

Okkur ber lögum samkvæmt að senda börnin okkar í grunnskóla þar sem allir eiga sama rétt á námi.

Sveitarfélögum er skylt að tryggja öllum nemendum viðeigandi námstækifæri.

Með ykkar hjálp og leiðsögn getur stofnun eineltissamtaka foreldra eineltisbarna orðið að veruleika og með virkri þátttöku sem flestra í samfélaginu ættum við að geta orðið að sem mestu gagni í baráttunni gegn einelti.

Hvernig getið þú séð þetta fyrir þér? Hvernig getur þetta hjálpað þér og þínu barni?

Við þurfum fólk eins og þig til að leggja okkur lið.

Þínar hugmyndir, þínar skoðanir og þitt álit skiptir máli. Þetta gæti verið barnið þitt.

Ég bið þig um að senda mér póst til baka eða hringja í mig til að láta mig vita hvort þú sjáið þér fært að leggja mér lið á einhvern hátt.

Ég bið þér líka um að áframsenda þennan póst á þá sem þú haldið að geti komið til liðs við mig því ég er rétt að byrja.

Sterkur hópur, dásamlegt hugsandi fólk hefur þegar svarað bænum mínum, haft samband og vill koma til liðs við mig.

Hugsjónafólk, fólk sem er annt um náungann.

Fólk með lífs- og starfsreynslu á þessu sviði og öðru sem tengjast þessu, sérfræðingar, áhugafólk og önnur samtök bjóða fram aðstoð við að koma þessu verkefni í framkvæmd.

Ég á ekki orð til að lýsa þakklæti mínu til allra þeirra sem hafa á einn eða annan hátt stutt mig og mína til þessa verks. Það er svo stórmannlegt og dásamlegt.

Ég finn að ég er ekki lengur ein.

En í hjartans einlægni þá þarf ég á þér að halda.

Með kærri kveðju og fyrirfram þökk.

Ingibjörg Helga Baldursdóttir

Grunnskólakennari

HS: 555-0259

GSM: 867-9259

ingabaldurs@gmail.com

Kveðja JJ

Hugurinn á fullu.....

Thu, 28 Aug 2008 01:33:43 GMT

Ég er að hugsa svo mikið að ég kem mér ekki í bólið. Enda gott að plana og hugsa í friði þegar dýrmætu börnin mín sofa.

Málið er að sonur minn er lagður í einelti í skólanum. Vandinn stækkar og stækkar og okkur finnst skólinn ekki taka á vandanum. Ég vona að svo verði eftir daginn í dag. Nei, ég ætlaði að skrifa : Það verður tekið almennilega á vandanum eftir daginn í dag.

Hvernig er hægt að ætlast til þess að ég sendi barnið mitt, dag eftir dag, viku eftir viku, mánuð eftir mánuð og ár eftir ár, þjakaðan af kvíða og hræðslu í skólann. Ég geri það ekki lengur - það er ekki rétt!

Ég og maðurinn minn höfum staðið með honum og reynt að hjálpa honum eins mikið og við getum. Nú erum við enn sterkari fyrir vikið og gefumst ekki upp! Ó nei ! Þetta mun takast núna.........

Við erum svo lánsöm að þekkja mikið af flinku og góðu fólki sem styður okkur og mun veita okkur alla þá aðstoð sem við þörfnumst.........

'Ahyggjukveðja Jóhanna J

Á vel við ....;-)

Fri, 15 Aug 2008 16:13:46 GMT

Speki sem á vel við hjá mér þar sem ég nálgast óðfluga fertugsaldurinn,híhíhí!

Hinn þýski höfundur Hermann Hesse (1877-1962) skrifar að því meira sem einhver þroskast, því yngri verður hann. Og vissulega er fullt af fólki sem verður kraftmeira og ötulla, víðsýnna og umburðarlyndara sem eftir því sem það eldist, lifir við meira frelsi og sjálfstraust. Það er mikilvægt að muna að það að eldast og það að verða gamall er ekki endilega það sama.

Þýtt úr For today & tomorrow, daily encouragement, Daisaku Ikeda

Öldrunarkveðjur Jóhanna J

ORÐSKÝRINGAR

Sat, 02 Aug 2008 00:07:13 GMT

Ég fann nokkrar nýjar orðskýringar á netröltinu í dag. Hvernig líst ykkur á þær?

        Að þykkna upp                        Verða ólétt.
        Að vera fokheldur                   Heimskur
        Afhenda                                     Höggva af hönd
        Almanak                                    Nektarnýlenda
        Bak-tería                                Hommabar
        Búðingur                                Verslunarmaður
        Dráttarkúla                             Eista
        Eigi má sköpum renna          Fær ekki drátt
        Flygill                                       Flugmaður
        Ferðaskrifstofa                     Skjalataska
        Glasabarn                              Barn getið í ölæði
        Hleypa brúnum                    Hafa hægðir
        Iðrun-Iðrast                            Fá niðurgang
        Kúlu-legur                              Feitur
        Kviðlingur                               Fóstur
        Lík-hús                                    Raðhús
        Lóðarí                                      Lyftingar
        Maki                                        Sminkari
        Meinloka                               Plástur
        Milliriðill           Sá í miðið af 3 eiginmönnum
        Nábýli                                     Kirkjugarður
        Pottormar                             Spagettí
        Riðvörn                                  Skírlífsbelti
        Sambúð                                  Kaupfélag
        Skautahlaupari                   Fjöllyndur maður
        Skautbúningur                   Kvennærbuxur
        Undaneldi                             Brunarústir
        Uppskafningur                    Veghefilsstjóri
        Upptökuheimili                   Stúdíó
        Úrhellir                               Kanna
        Úrslit                                  Bilun í úri
        Veiðivatn                            Rakspíri
        Verkefni                             Höfuðverkjatafla
        Viskustykki                          Heili

Þetta hljómar nokkuð sannfærandi. Hehehehe!
Karlotta systir átti 28. júli fallega prinsessu og þeim vegnar báðum vel

KVEÐJA JJ

Gamli karlinn

Sun, 27 Jul 2008 01:21:45 GMT

Jæja Karlotta systir enn að bíða eftir því að fara eiga stúlkuna. Nú er hún alveg komin á tíma og allir farnir að bíða, voða spenntir.;)

Góður brandari um barnseignir:

90 ára gamall maður var í árlegri læknisskoðun og læknirinn spurði hann hvernig hann hefði það.
"Mér hefur aldrei liðið betur. Nýja konan mín er 18 ára og hún gengur með fyrsta barnið okkar! "

Læknirinn hugsaði um þetta eitt augnablik og sagði svo:
"Einu sinni var maður sem var mjög ákafur skotveiðimaður, hann sleppti aldrei neinu veiðitímabili. Dag einn var hann á mikilli hraðferð og hann greip með sér regnhlíf í staðinn fyrir riffilinn sinn.
Þegar hann var kominn langt inn í skóginn þá gengur hann fram á stóran og grimman skógarbjörn.
Hann miðar á hann með regnhlífinni og bang, björninn dettur niður dauður! "

"Það er óhugsandi, sagði gamli maðurinn, einhver annar hlýtur að hafa skotið hann. "

"Já..........það er nú eiginlega það sem ég var að reyna að segja," svaraði læknirinn.:$:$:$

Spennukveðjur Jóhanna J

Þetta er gott fyrir mig..

Thu, 24 Jul 2008 00:42:13 GMT

Ég ætla tileinka þessa færslu afmælisstúlkunni, Svanhildi mágkonu minni. Ég er svo heppin að eiga bestu mágkonu í heimi sem alltaf er til staðar fyrir mig og mína hvort sem er í gleði eða á erfiðum stundum. Svanhildur, takk fyrir að vera til!

"Við eigum líf okkar sjálf. Það á enginn annar að segja okkur hvernig við eigum að lifa því. Allt og sumt sem býður þeirra sem leyfa sjálfum sér að lifa stanslaust undir áhrifum frá því sem aðrir segja eða gera er óhamingja. Við þurfum einfaldlega að hafa þá trú á sjálfum okkur að við getum sagt: “þetta er rétt, þetta er slóðin sem ég vil fylgja. Þetta er gott fyrir mig.” Hamingja fæðist af slíku innra hugrekki."

Afmæliskveðja Jóhanna J ( Karlotta systir er að fara eiga litla stelpu fljótlega, vonandi í dag)

Brosblogg

Mon, 14 Jul 2008 00:06:30 GMT

:Hér er setning sem ég tók af blogginu hennar Eddu Björgvinsdóttur leikkonu með meiru.

"Það verður allt svo miklu auðveldara í hversdagsleikanum þegar maður finnur fyrir hlýlegu viðmóti og þegar fólk sem maður mætir á förnum vegi sendir manni fallegt augnaráð - jafnvel bros" :haha:

Ég skora á ykkur að senda falleg augnaráð og bros eins oft og þið getið í dag.

Brostu til alls og allra
í árvakri mannúðargjörð
og brosið mun birtast þér aftur
í brosi frá himni - og jörð :lol:

Ég er alltaf að reyna að koma því við að fá kaffisopa í Skerjafirði........hehehhehe öllum brögðum beitt............... þið látið mig endilega vita ef það er búið að hella upp á á Einarsnesinu ;)

Bros kveðja til ykkar allra Joe Joe

Snillingur!!

Sun, 13 Jul 2008 01:13:31 GMT

Speki fyrir daginn í dag!

Beethoven er kallaður snillingur. En við þurfum að muna að snilld hans var afrakstur ótrúlegs erfiðis. Þegar allt kemur til alls, er þetta mikil vinna, þolinmæðis-vinna. Þú getur ekki orðið manneskja af bestu gerð ef þú hefur kæruleysislegt og léttúðugt viðmót til lífsins, ef þú heldur að allt gerist bara af sjálfu sér. Þessvegna voru einkunnarorð Beethoven’s “minnst ein lína á dag.” Og það brást ekki að á hverjum degi skrifaði hann músík. Hann lét ekki einu sinni einn dag líða án þess að vinna eitthvað.

Hafið það sem allra best snillingarnir mínir
Jóhanna J

Ég er hér.....

Fri, 04 Jul 2008 14:57:13 GMT

Loksins heyrið þið eitthvað frá mér! Ég er með brandara handa ykkur í dag!

Þrjár konur lentu í bílslysi, dóu og fóru til himna.

Þegar þær komu þangað sagði Lykla-Pétur við þær, "Það er aðeins ein regla á himnum:
ekki stíga á endurnar!"

Þær fóru inn um hliðið og sáu að það voru ekkert nema endur út um allt. Það var
eiginlega ómögulegt að stíga ekki á neina þeirra. Konurnar þrjár pössuðu sig á því
að stíga ekki á neina önd, en því miður steig ein konan ofan á eina önd.

Um leið kom Lykla-Pétur með ljótasta mann sem hún hafði á ævi sinni séð.

Lykla-Pétur hlekkjaði þau saman og sagði "Refsingin fyrir að stíga ofan á önd er að
eyða ævinni, hlekkjuð við þennan ljóta mann!"

Daginn eftir, steig önnur kona alveg óvart ofan á eina öndina. Lykla-Pétur mætti
strax á svæðið með annan rosalega ljótan mann. Hann hlekkjaði þau saman eins og hann
hafði gert við fyrstu konuna.

Þriðja konan sá þetta allt og vildi alls ekki eyða ævinni, hlekkjuð við ófríðan
mann. Hún var því ofur varkár þegar hún steig niður fæti.

Mánuðir liðu og henni tókst að sleppa við að stíga ofan á önd. Einn dag kom
Lykla-Pétur til hennar með myndarlegasta mann sem hún hafði nokkurn tíma séð.
Hávaxinn, massaður, með löng augnhár og grannur.

Lykla-Pétur hlekkjaði þau saman án þess að segja orð

Hamingjusama konan sagði "Hvað ætli ég hafi gert til að verðskulda það að vera
hlekkjuð við þig að eilífu?"

Myndarlegi maðurinn sagði "Ég veit ekki um þig, en ég steig ofaná önd!"

Hafið það sem allra best kæru vinir

Jóhanna J

Litli prinsinn

Sun, 25 May 2008 12:41:24 GMT

Það, að hafa hjartað á réttum stað er mikilvægast af öllu. Í sögunni Litli
prinsinn, skrifar franski rithöfundurinn Antoine de Saint-Exupéry: ”það er einungis með hjartanu sem við getum séð réttlátlega; það sem skiptir mestu máli er ósýnilegt augunum. ” Það er alveg eins og hann segir. Við getum ekki alltaf séð hvort eitthvað er ekta bara með því að horfa á það. Það er bara með hjartanu sem við getum þekkt hinn sanna kjarna.

Þýtt úr For today & tomorrow, daily encouragement, Daisaku Ikeda

Kveðja Jóhanna

Falleg hugsun

Tue, 29 Apr 2008 23:50:57 GMT

Ég fékk þessa speki senda í dag! Vá hvað ég vildi að allir kennarar hugsuðu svona! Því það skiptir svo miklu máli hvernig kennara barnið manns hefur og hvernig því líður í skólanum.

Verðlaunahafinn Gabriela Mistral (1889-1957) frá Chile var vel kunn sem mannúðlegur kennari. Til marks um hið mikla hugarfar samúðar og umhyggju sem hún sýndi nemendum sínum er “bæn kennarans”: “Láttu mig vera móðurlegri en móður; gefðu mér að elska og verja með tilfinningahita móður það barn sem er ekki hold af mínu holdi,. Láttu mig giftusamlega móta einn af nemendum mínum í fullkomið ljóð, og skilja eftir innra með honum/henni mitt hljómfegursta lag sem hann/hún getur sungið þér er varir mínar syngja ekki lengur.”

Með þessu sama hugarfari, skulum við bera umhyggju og hugsa um unga fólkið.

Þýtt úr For today & tomorrow, daily encouragement, Daisaku Ikeda

Jæja ég er að fara í fyrramálið til Tékklands í ævintýraferð/námsferð með mínum yndislegu vinnufélögum. ooohhh hvað ég hlakkka til! Hafið það gott á meðan og njótið lífsins

Jóhanna Prostéjovfari

Mótlæti/hamingja

Sat, 26 Apr 2008 12:09:28 GMT

Pæling dagsins hjá mér!

Mótlæti fæðir af sér stórfengleika. :$

Því stærri sem áskorunin er og því meiri erfiðleikar sem mæta okkur, því stórkostlegra tækifæri fáum við til að vaxa og þroskast sem manneskjur. Líf án mótlætis, auðvelt og þægilegt líf, skapar ekkert og skilur ekkert eftir sig. Þetta er ein óumdeilanleg staðreynd lífsins. 8|

Þýtt úr For today & tomorrow, daily encouragement, Daisaku Ikeda af Láru Þórisdóttir:d

Hafið það gott og verið góð við hvert annað :lol:

Jóhanna J

Vinarkveðja

Tue, 22 Apr 2008 16:25:15 GMT

Þú hittir ótrúlega margar persónur á lífsleið þinni,

en það eru bara sannir vinir sem skilja eftir spor í þínu hjarta.

Til að geta stjórnað sjálfum þér, notaðu hugvitið;

Til að stjórna öðrum, notaðu hjartað.

Gáfaðar persónur tala um hugmyndir.

Minna gáfaðar persónur tala um hvað gerðist.

Illa innrættar persónur tala illa um aðra.

Sá sem tapar peningum missir mikið.

Sá sem missir vin tapar miklu meira.

En sá sem missir trúna á lífið sjálf, missir allt.

Við erum vinir þú og ég, ef þú tekur vin þinn með erum við þrjú.

Við getum stofnað lítinn vinahóp.

Það er jú ekkert upphaf og enginn endir,

njótum lífsins og verum góð hvort við annað því lífið er svo stutt

þrátt fyrir allt og þess vegna ætti ekki að vera tími til að tala

illa um aðra.

Kveðja Jóhanna

Jákvæð hugsun

Tue, 08 Apr 2008 00:30:50 GMT

Sonur minn, Matthías 6 ára, þurfti í dag að fara til læknis. Honum kveið mikið fyrir því hann vissi að hann mundi fá sprautu. Í gær fór hann að gráta og sagði "plís, plís mamma ekki láta mig fara, þá ertu best í heiminum!" Ég sagði að ég væri auðvitað best en hann yrði að fara og hann gæti þetta alveg. Hann var mjög ósáttur :frown: þegar hann fór að sofa en vaknaði glaður og kátur. " Ég verð að sleppa sundi í dag, þess vegna er ég glaður, ég verð að fara til læknis einmitt þegar sundið byrjar".

Ég sótti hann svo í skólann og fór með hann heim til að setja á hann deyfiplástur í olnbogabótina svo það yrði ekki eins sárt að fá sprautuna. Matthías sagði þá : " Ég ætla ekki að fá sprautuna, ég ætla sparka í þann sem kemur með sprautuna og hlaupa í burtu frá ykkur og fela mig." :( Ég sagði bara: " ég veit þú getur þetta alveg Matthías". Á leiðinni inneftir var hann neikvæður og fúll en þegar við vorum komin á staðinn, var hann hvers manns hugljúfi. :) Hann fékk sprautuna, beit á jaxlin og grét pínu þegar konan þurfti að stinga hann 3x vegna þess að æðin brást illa við og lokaðist. Siðan fór hann í ct myndatöku sem tók 20 mínútur og hann mátti ekki hreyfa sig né tala á meðan. Höfuð hans var vel skorðað og ólað niður á meðan (ábyggilega mjög óþægilegt). Það gekk vel fyrstu 10 mín. en var erfiðara fyrir hann seinni 10 mín. aðallega vegna þess að honum sveið svo mikið þegar sprautað var í hann skuggaefni. Síðustu mínúturnar voru mjög erfiðar þar sem hann barðist við grátinn og var orðin ansi óþolinmóður. En þetta tókst allt saman og honum var hrósað svo mikið af þessum indælu konum sem þarna voru.

Þegar Matthías var svo að fara sofa áðan sagði hann, brosandi og stolltur á svip :" Ég er svo heppinn, heppinn að hafa farið í svona myndatöku, nú get ég sýnt öllum plásturinn og sagt frá þessu. Sagt öðrum hvernig það er að fara í svona myndatöku og hvernig er að láta sprauta sig. Og ef til dæmis Sólrún og Guðlaugur þurfa einhverntíman að fara, þá get ég hjálpað þeim og sagt þeim að þetta sé allt í lagi - manni svíður smá en svo þegar þetta er búið þá fer sviðinn strax". Svo brosti hann enn stolltari og sofnaði innan við 5 mín. Sáttur og glaður með sig :d

Þetta kalla ég sko "Jákvæða hugsun"!!!! Frábær drengur!!:lol:

Kveðja Jóhanna bloggari :$